زعيم القوم

[هاوي نجد]

هذه القصيده لها مناسبه مع احد الاقارب امل ان ترتقي لذائقتكم




ترا زعيم القوم لاما تقدم = فيه الخصال الوافيات الحميده
قوي حجه فالحجج ماتفلهم = ومن دون ربعه ينثني فالطريده
ريفً على ربعه ومن جاه ينعم = وليا نقص ميزان كفه يزيده
من دون جيرانه حمى كل معلم = ترتع سوارحهم بليا ضديده
مايتلب الجاده وليا من عطى تم = ويعطي اليا شحت كفوفً زهيده
سيفً صقيلً للعدا ضربته سم = كم سربةً طمعت وعادة شريده
والا الردي لمن تشيخ غدا غم = يقول انا راعي الفعول المجيده
قليل عرفً هافينً لاحكى نم = وشيكه من الجزلات خاليً رصيده
دقيق سلك ماحصل منه مغنم = تلقى الردي واللاش مجنى حصيده
من كثر ماله صار شيخً ويزعم = والناس ترفي له بقولة وليده
هذي علامات القيامه كما النجم = تأمر الهافي وشيخة عبيده