صباحات الربيع صباحات العجاج

[شاكـر محمـد]

اجتمعن وكنهن الخوف والشوق الدفين= ذي صباحات الربيع وذي صباحات العجاج
قصة اللي مغترب عن ديرته عدة سنين=شال عفشه معْه لكنه نسي الابتهاج
اجتمع خوفي مع شوقه على درب الأنين =واقتدح زند القصيد وهاج بحر الشعر هاج
كان دوبه طفل ويظن السفر والبعد زين=وانصدم في واقعه مظلم *ولا فيه انبلاج
كل شي عنده ولكن ما يخليه الحنين=شعة الليزر تذكره ابضوى هاك السراج
ولو يشوف الغيم وقّف ينشده قد كنت وين=ظنّه انه مرّ من ديرة معدلة العواج
ويدعي الباري يسوقه صوب ديرته ويحين * =ويجعله رحمه بها تروى وسيعات الفجاج
ودي ارسل له مع التقدير باقة وردتين=من ورود الديرة اللي شوفها طب ّ وعلاج
الديار اللي على فرقاه تبكي كل حين=تمتني وطية قدمه وحنّت *لمشي الغناج
وحنّت لسجدته لما تَلْثَمه وسط الجبين=وحنّت لعطره *ولانفاسه وحنّت للدعاج
شفت متعلق في اهدابه بقايا دمعتين=ردها طول الهدب والسحر في رسم الحجاج
والعيون انظر بقلبي فعلها يابو حسين *=وباقي اوصافه تتعبني وفيها الفكر داج
اشهد انه رائع ولو ما حكى الا كلمتين= واشهد انه ذوق وانه راقي وعالي مزاج