لاتناظرني بعينك يالمهاجر

[نجم الإبداع]

فلاح)ياسلام الله على الطير المهاجر = من صفا نيه نبي ناخذ علومه
كنه الليله مصوب بالخناجر = والله اني منتقد رمية سهومه
الطائر)انت ياالطباخ اطبخ في الطناجر= ولا استوى طبخك فعرمش في عظومه
لا انت لابس لاحلق ولا بناجر= وش نبي بك شايبٍ راحت حلومه
فلاح)انت مانته مستقيم ودوم ضاجر = قلت باسلم عليك وشفت ثومه
تدعي بالدين دايم وانت فاجر = وان مشيت احس في علباك دومه
الطائر)من سمع هرجك يظن امام ساجر= جاي ياعظنا مقصر في هدومه
من عرفتك غاويٍ كثر التشاجر= يالحطيئه جز واغتنم بالملومه
فلاح)كنك الا ضب تايه بالدياجر = مندعس عالخط خارج منه شومه
الطائر)انت تايه لو قصدت تروح حاجر=ضايع ما بين صعده او تنومه
من سمع هرجك يقول البيه تاجر= وانت طرار شريد وسط دومه
فلاح)انت تجمع بالحفايظ والبياجر = والنهار عيونك الحولا تنومه
ياسليل سجاح مانته لي بزاجر= ماتحج وشهر ربي ماتصومه
الطائر)شان احفظ من يوسخ في الدياجر=لكن الحفاظ اصغر من حجومه
ابتديت تخور من هرج الحناجر= ثورك معمعم يكفر في خصومه
فلاح)مامعي لك غير مشعاب وعواجر = يالذي في شدقك الايسر نعومه
بارسلك يافرخ لم ارض الهواجر= مانت صقر وكن وجهك وجه بومه
الطائر)خلها عنا بعيد ولا تواجر= ما خبرنا الذيب يخشى من يرومه
انت لا طينه ولا ظنيت آجر= انت بويه ذايبه او شبه عومه
فلاح)انت قرد وطختك طخت سناجر = ماعرفنا الكيش وشلي من سلومه
زمجري من ضمن مجموعة زماجر= خشمك الملوي تلوى من همومه
الطائر)ضاع قافك وانت بقرودك تتاجر=من شرى له قرد مثلك من يلومه
فلاح)والحقيقه انته تجيب الفواجر = جيت اسلم وانت مارديت سومه
سامحك ربي وانا ياخي باهاجر=واترك الميدان لك يشعل نجومه
لك مقامك عندنا مير انت واجر =توجر اخوانك حطيئيات شومه
لاتناظرني بعينك يالمهاجر = والله انك حسبة اولاد العمومه