منتديات الفطاحله - النفس لقمه والمنايا خواطيف

[QUOTE=سعود القت;242921][poem=font="Simplified Arabic,5,,bold,normal" bkcolor="transparent" bkimage="" border="none,4," type=2 line=0 align=center use=ex num="0,black"]
ياللي تنشد ماعليّه تخاليف = ولنته مداوي مقلتي من رمدها
عايش بغفله في علوم وسواليف = وانا لياليّه توالي هددها
أفز للمعروف وافز للضيف = واثني الجميله لو عميلي جحدها
واقدّر اللي له عليّه معاريف = وربعي خطيتهم تموت بمهدها
واثني بوقت اللازمه والمواقيف = ولحدٍ ذكر في قمةٍ ما صعدها
ودنياي عيّت لا تجيلي على الكيف = باحت خفاي الله يبيد جهدها
لو جيت اوصفها عديمة تواصيف = المسعد اللي ما يجي في نصدها
تغنج وخلق الله عليها مشاعيف = تمدهم بحبالها وتعقدها
دايم مخالبها حدادٍ مهاديف = وان مست الاطناب تثبت وتدها
والنفس لقمه والمنايا خواطيف = ومن هاب له من غبةٍ ما وردها
ويالله في نوٍ قنوفه مراديف = براقها يلمع ويرزم رعدها
تاخذ ثمان ايام سحبه مقانيف = حقوق وسميه بحيلك مددها
غثو المسايل بالشجر كنه الليف = ديموم سبلٍ مختلط مع بردها
منه المحاجر والخباري مذاريف = وامزونها تردم ويكثر لبدها
لين ام سالم به تجر الغطاريف = وتنسابه النفس الشقيه نكدها
وبعد اسبوع يفع نبت الشفاشيف = وتسمن به العرا وتطنخ ولدها
ولاعد تجيب البدو طار المعاليف = يا ونسها يا فرحها يا سعدها
تتبع هوى شقح البكار المشاعيف = بدوٍ ومفتاح الجمايل بيدها
والعمر عدٍ والليالي مغاريف = والنفس ما يشبعها الا لحدها[/poem][/QUOTE]

سعود القت
يعجز الكلام في شاعريتك
وحاولت ان اجد منها بيت او بيتين لجعلها عنوان لردي فلم استطع
متماسكه ومكملة لبعضها
(( والعمر عدٍ والليالي مغاريف = والنفس ما يشبعها الا لحدها ))
هذا البيت هو قلب القصيده في نظري
وهويبين لقارئه ان قبله شي او بعده
وهو مارأيته وقرأته
عموما لاهنت وكثر الله من امثالك