الله يردّ المسافر طوّل الغيبه = لو هي اسابيع عندي عدّة اعوامي
له وحشةٍ زادت بقلبي لواهيبه= من حرها اوجس النيران بعظامي
البدر لا غاب ماللكون من هيبه= مهما النجوم كثرن باعداد وارقامي
يطول ليلي تناوشني مخاليبه = خوفٍ وهوجاس والكابوس باحلامي
لا سافر اللي تحبّه اكبر مصيبه = يبحر بك الهم في وسواس واوهامي
ما تامن الوقت فالأقدار تجري به= ولا تدري اللي تخبي سود الايامي
واللي مسافر ترى يسلى عن صحيبه= المشكل اللي على جمر الغضى نامي
ولو كل منهم يعيش الوقت تغريبه = احدٍ بكيفه واحد في الغربه الزامي
لا كلمّه من يحبه ما وضح عيبه = يقول مبسوط يخفي جرحه الدامي
فالقلب عند السفر تكشف عذاريبه = ولو هو قويٍّ تحوّل كومة حطامي
وأنا بغربه وحالي صارت صعيبه = يمضي بي الوقت مثلي مثل الايتامي
والاّ كسير يجرّ الصوت ويجيبه = محدٍ سأل عنه من صدقان واقوامي
ينطر حبيبه لعلّ بيوم يدري به= يفهم مشاعره ما يحتاج لافهامي
مسيت بالحب نبع الحب والطيبه= صبحت بالخير مصدر كل الالهامي
اتعبني القيد ليت القيد تركيبه= ان كان افكّه ولا حسّيت بالآمي
ارجع اليّ ترى طوّلت بالغيبه = ارجع اليّ قبل ما تكسب آثامي
يالله ترد المسافر بالف ترحيبه = افرح بلقياه ينعش قلبي الظامي