البحر......والملاح
وش اللـــي من معانــاة الزمن في داخلي ماناح
وش اللي جـرني يم العـــذاب وبـــدد احـــلامي
وش اللي وسط غيمة فرحتك من حرقتي مالاح
وش اللي حرك احـــلام السكون وتعب اقدامي
تمنيت اندفن في داخـــل احضان الدفا وارتاح
لقيت ان الجليـد اللـــي يلفـــك كسر اعــظامي
تخيلتــك بـحر ساكـن وانــا في داخلــك مـــلاح
لقيت اني على شــط البــحر مـن حرتي ظــامي
اسولف للقمر وشلـون اكــون البــاب والمفتاح
واكون الحارس اللي للعيــون ورمشها حــامي
سرى ليلي على نسمة شـذاك وعطرك الفـواح
اطــارد في سرابــك واتخيــل فــرحة اوهــامي
الا ياليت لـي صبر الجريــــح وهمـــة الفــلاح
واسافربعد مــانــاح الخفــوق وجرحـه الـدامي
ادور من يـداوي علتـي لــــو كان حظي طــاح
يلمــلم كـــل عبـــرات السنين ويمسح الامـــي
احارب وسط زخـات الحزن وانا بدون اســلاح
نبيل ومقصدي مــع صاحبي رغـم العنــا سامي
لك الله ياخفــوقي كل ماحولك وهــم واشبــــاح
تحاشيت التعــب بس التعب مرســوم قـــدامي
ومــع صمت الشفايـف مابنيته في ثواني راح
بكــت كـل القصايـد من عناي وجفت اقــلامي