ما علموك اني ايلا مني بغيت اكتب قصيد=اطوح الغتره هنا واطوح عقالي هناك
ايوالله ان الوضع مرّاتٍ علي وضعٍ شديد=او قل هجوسي وسط صدري بينها صار اشتباك
قلي متى فلوا حديد الا اذا جوه بحديد=وفل الشعر مثله ولكن يختلف فالاحتكاك
ياصاحبي لامن بغيت اعلمك علمٍ اكيد=ما هوب لا يتبع هواي ولا يدور عن رضاك
لو تختم كتاب الادب وتلحّقه بعض النشيد=ومافيك بذرة شاعرٍ ماغيرت في مستواك
واما عرض لك في حياتك عارضٍ حتى تجيد=فن اعتراض الشي في وقته وتحداه بعصاك
وتفجر احساس الشعر في داخلك نعرة عنيد=ولا تترك التعبير لو انك على حد الهلاك
شفني وانا واقف هناك اربع ليالي لا جديد=في حالة ٍ فيها آسى فيها فرح فيها ارتباك
مثل الذي مرسل رسالة حب يستنى البريد=اما يجي ردٍ تعال او رد رح عنا وراك
من شان بيت من الشعر يفوح دمي فالوريد=ماهيب شغلة خذ قلم واكتب حبيبي ياملاك
يالغايبه نار الجفا توقد على صبري وقيد=والشوق ما خلى مكانٍ مازرع وسطه غلاك
كم استعيد لنظرة عيونك ويا كم استعيد=صوتك تلعثم فالحكي يغلب على صوتك حياك
ما زلت ادور لك على شي ٍ يترجم ما اريد=وتجفل بيوت الشعر والعذر استحالة مبتغاك
الفارس المغوار ما ينطحك يا سيف الوليد=والشعر كله في حضورك يعتريه الاّ حراك
من وين يلقى مفرده تستوعب الشي الفريد=وعلى مداه المتسع اصبح ولا شي بمداك
يالغايبه ردي على صوتٍ ينادي من بعيد=قولي سمعتك يالغلا ولا تقولي وش بلاك