[هاوي نجد]

ياشوق حاديني من الوقت حادي = حدي الركاب اللي حدتها المعاويد
وقتي علي ميل بثقله وزادي = وثق حباله في يدي واحكم القيد
لوكان حملاً ينهجس كان عادي = جيتك ولا يحتاج كثر المواعيد
بس الجمل بارك وفيه القيادي = متوهن حيله عقب لفحة البيد
ونطعتني ياشوق خلك حيادي = ادله وسج وروح ياسيد الغيد
لاترتجي شخصاً بعيداً وغادي = في دبرة المولى على غير تحديد
ياشوق لو تندم عليه وتنادي = ماعاد توجع ضربة الميت بالحيد
فرطت في ترويض طير الهدادي = اللي يدسم كف راعيه بالصيد
طيراً شلع وقفا ثبات وكادي = لوكان ترفع نبرة الصوت وتزيد
طبعك عنيد وزايداً فالعنادي = جنيت زرعً ثمرته كلها كيد
وانا شيوم مهتوي كل زادي = لو سفرته صافي الذهب قلت ماريد
لاتشتحن والرب رب العبادي = ماخيّب اللي وحده يطلب الفيد