ياقوم يالي جهلكم شمخ وطال =والعقل فيكم يشتكي من وثاقه
دكوا هبل دكاً ونا اعطيكم رجال=يملون هذا الكون طهر ولباقه
وجيههم مستبشرة عند الاقبال =ولحاهم اطهر ما ظهر مع اناقه
ذولا مصابيح الدجى بوقت الا هوال=ماهم مصابيح الدجل قوم ناقه
البارحة بالحلم جرّيت موال=مشكاة راسي زاير الخير ساقه
يقول والي نزّل الحق ماقال=ثلثين بلواكم من اهل الحماقة
جهم الوجيه ولا عليهم من عقال=سحم القلوب معبّسين وعواقه
هم طاق مع طرباق وعقولٍ هزال =يا فكرهم يا لاق ما من حذاقه
الي يحسْبون النصر طعن وقتال=وضيّق على الكافر طريقه وشاقه
ودين النبي ، أخلاق وسموته جلال=بسمة وعدل ٍ كنّك تمد باقه
صدق وتعامل خير والدعوة اشكال=الدين ما احلا يابشر ، من مذاقه
شوفوا هنا طوفان وهناك زلزال=والظلم متفشّي بنا له عراقه
انا اعرْف انّ القيامة لها اهوال=والي نشوف اليوم منها ! بطاقة
عبرة لمن له قلب !ماهوب تمثال=بينه وبين الخير عهد ورفاقه
يفرح ايلامن شاف الاسلام مدهال =والخلق تنعم بالطهر في رواقه
وبعض البلاوي من هتاهيت الازوال=يسوقهم دجّال روما سواقه
غرّتهم الدنيا ودنيّات الاعمال =والمال حلّق فالمبادي حلاقه
سَفرة وبار وبنت سهرة ، ولوّال =وعقولهم ، لا عاد ترجي افاقه
قرود تتحرّى من الغيم منزال =او هي خنازير ٍ تبيها صفاقه
احسّ بالوحدة ولا بي من هبال =اللي بي إن الوقت باكي فراقه
ماني مع العالم وسمّوني (خبال) =الا الخبل من عاش معهم علاقه
الا رض سربلها من الشرّ سربال=وتزلزلت من زود مبها حناقه
قد اقترب للناس شوّال عوّال=دوّال صوّال الخلايق ، فواقه
ياربّ إنّي منذر النّاس فعّال =ومالي بلا مدّك على الناس طاقه
هم بانتظار اللي له دهور قد حال=سوار كسرى بمعصمك يا سراقه
يارب قلبي ينعصر خوف ماهال =واشمّ ليّ شهور ريح احتراقه
الا انني ازرع بساتين الامال=لو النخل من ماء عيني اعتراقه
جلدي تكشعر وانصرع عندي الفال=والغيب مالي قدرةٍ باختراقه
لكن دنا اللي تشيب له روس الاطفال =وينفتّ له ثهلان بعد انفتاقه
نجم وصليب ومعهن ينوّح هلال =ولا ناجي إلا من تعلّق براقه
حم وانفكّت عن الغايب اغلال =حم والعالم جزرها نياقه
حم والحمرا تحت سوط جمال=مقدم وياهو حان يقطع سباقه
يارب يامنزل تبارك والانفال=تهدي خفوقٍ كن فيه انزراقه
من حزنها نفسي على جموع الآجال=كنّ النَّفَس ميقن دنوّ انزهاقه
وياقوم ياللي جهلكم شمّخ وطال=الاعور احكم في الخلايق وثاقه
بو زيد ياللي تنشدونه متى شال=يوم النذير لباب موشك غلاقه