[مجدي صالح المبارك]

لبى قلبه لبى صوتـه لبـى حكْيـه واللباقـه=لبى شعره لبى ثغـره لبـى عنّابـه و ريقـه
خشف ريمٍ لاتهصّر لعنبـو حـي الرشاقـه=طيّر الخفّاق حسنه والعَقل يغمـى و يفيقـه
ضامر السرجوف لانسنس نسيم الصبح ساقه=لين ماعطّر جهات الأرض من صافي رحيقه
في عيونه بحْر طامي والكحل ضيّـق خناقـه=أنكسر مجداف قلبي فيه وانفاسـي غريقـه
و من خدوده يسرق التفاح حمْرته و مذاقـه=آه من ورد السواطر لا خجل بين الخليقـه
بو ثمان اللي يذوب الشهد في ضفّة عراقـه=سدّد (ا)سهام الرموش و لا قدر صدري يعيقه
فيه سلّة سيف تقطع دابر القـوم وشقاقـه=منتصب دونه أسيلٍ تؤام البـدر و شقيقيـه
قاهر (ا)رهاف الترايب كل جمال الغيد فاقه=حفْيت ابياتي ولاجت للمقام اللـي يليقـه
من لحظني لابعيرٍ لي بقـى أو خـفّ ناقـه=وين مايمّمت وجهي كل خطواتـي طريقـه
طحت في حبه وقلبي رافعٍ كـفّ اشتياقـه=رغم شرهات الليالي والجراحـات العميقـه
ماقدرت املك هواه ولاقدرت اخرق نطاقه=الهوى مهما هربنا منْه لـه عـروه وثيقـه