[محمد بن عمار]

السلام عليكم

من لايعرف القصيد ويفهم اسلوبه = لاهوبشاعر ولا له في الشعر داعي
ترى أكذب الشعر، كله فن وعذوبه = لا صار من شاعر ٍ عاشق وملتاعي
ومعذور راعي الهوى لوهو فرى ثوبه = الحب ، نزلّ رفيع الشأن للقاعي
والوصف فني متى ما شفت رعبوبه = تستاهل أحلى الكلام وزبدة إبداعي
خشف المها كنها الألماس مصبوبه = الطرف عن شوفها بالصد ّماطاعي
أو كنها ، من بنات الحور مجلوبه = كل من نظر حسنها منه العقل ضاعي
كل ما تثنتّ ، تتل الروح بإعجوبه = ومن زفرتي بالحشا تخالف اضلاعي
أصفق عليها بكف لكف مضروبه = وأدق صدري وأعض بنابي إصباعي
وإذا حكت كنها للهرج ، مغصوبه = وفي صفحة الخد نور ٍ يرسل شعاعي
منها الحياء يحتشم الى مشت صوبه = يقصر لها خطوته بالشبر والباعي
وكن المجامر، بوسط الثغر مشبوبه = والثلج كلما تبسّم، فى الجمر ماعي
وامجدلات ٍ على الأمتان مذبوبه = وفي روضة الصدر طلع ٍ روسه رفاعي
الدانة ، اللي عن الأعيان ، محجوبة = تخشى على نفسها من كل طماعي
تسبى العقل والارادة ، شبه مسلوبه = بخيالها اللي إلى جاء قمت مرتاعي
قدمّت روحي ، على الكفين موهوبه = لحظة رمتني بلدّة سود ، ووساعي
حب الشرف مايعرف العيب والحوبه = ما دام سرّه ، من الأثنين ، ماذاعي
وهروج بعض البشر، ماهي بمرغوبه = البيع في سوقهم ، جملة وقطّاعي
وإلا البعض هرجهم بألفاط محسوبه = الى ا شتروا سلعة ٍ ماهيب تنباعي
بحرالهوى كان به عشاق مرّوا، به = فأنا بوسطه ، غريق ، لغاية نخاعي
واللي ابتلى في الغرام وبانت عيوبه = الله يعينه على الحسرة والأوجاعي
كم واحد ٍ في العمر مانال مطلوبه = ماحصّل إلا الشقاء ، من كل الانواعي
والدمعة إن كانها من ذل مسكوبة = في عزّ ة النفس محد ٍِ يقبل اخضاعي
إن كان طرق الهوى للمبلي عقوبه = فالله غفور ٍ ، مجيب ، لدعوة الداعي
بأدعيه ، تالي حياتي يقبل التوبة = عن كل زله ، جناها الطرف ،وذراعي

مودتي لقلبوبكم