[عبدالله الدخيل]

بسم الله والحمدلله والسلام عليكم ورحمة الله

يا قلب لا باس لا تحْزنْ وَلا تزْعلْ وَلا تسْتضيق=ياكمّ شفت الهموم ابْوسْط صدري ترْعد وْتبْرقي
لا ضقت حلّق سما وارقا ضلوعي يالقطام الطليق=محد ٍ عن الضيق سالم وانْ كتمْ لا بدّ ما ينْطقي
كانك تحسّف على من يخْذلونك يا وفيّ الرفيق=فاسمع علومي عسى تنْفعْك فـ اللي من سنينك بقي
مهما لقيت ابْزمانك من صواديف البلا ما يعيق=فايّاك تظهر دُخَان الغيظ لا صار القهر يحْرقي
طيب الرجل بالجَلَدْ لو كان بالدّاخل رهيف ٍ رقيق=لا غارت اصْروف بقعاء قال ولّي للفنا وامْحقي
اصبر ياقلْب العنا لا تفْرح العاذلْ وتزْعل صديق=درْب الصّبرْ للرجاجيل ابْتلاء يا تنزل أوْ ترْتقي
عامل رجال الوفا واللي هفا في طيب الاصْل العريق=واعمل حساب احْتياطي قبل ما الفلقه تجي تتّقي
وعسّ الخوي عسّة اللي هقْوته للرّبْع يمْكن تليق=وبيْبيْن لك موقف الرّجّال والدّجّال في ماتْهقي
واكسب من النقد لا جاك الظّفر في مرقبٍ به بريق=واطلق نجومك فضا بالعلم من نور الضمير النّقي
يا قلب وضّبْتك بْتدْريب وانْت احْذر صدوف الطريق=ولا ضقت حلّق سما واطلب منَ المولى متاب التّقي

وسلامتكم
أخوكم \ عبدالله الدخيل