[داعي الشوق]

كل جرحٍ بقلبي ياحبيبي برا = كود جرحٍ جرحني منك عيا يطيب
و كل همٍ نسيته في حياتي طرا = صرت بحمول همي بس اودي واجيب
يوم ظنك بدا لي كن فيه إفترا = حز في قلبي اللي دوم منك قريب
يا اريش العين قلي كيف هذا جرا = ما هقيت الموده في نظركم تخيب
لا تبيع بهوى اللي في هواكم شرا = لا تموت المشاعر من حبيب لحبيب
ياحبيبي غرامك فيه ليلي سرا = ذاب قلبي و صار الليل امره مريب
ضاعت ايام عمري في رجاكم ترا = باح سدي و صبري صار ليـّه صعيب
شوف واحة ضميري كيف يبس الثرا = و انت لي مثل سيلٍ سال وسط الشعيب
محدٍ عن اسرار حبك ياحبيبي درا = واسرار حبي معك ما ظن عنك تغيب
كم ليله عشانك دمع عيني جرا = صرت في دنيتي يازين مثل الغريب
آه يا حالي اللي في هواك انبرا = يا دوايه و دايه يالعذيب العريب
و آه يا وجنةٍ فيها الورود احمرا = والشفايف حلاها فيه شي رهيب
فيه غنج و دلال و فيه بعد اكثرا = لو بدعنا القوافي لجل وصفه تشيب
يا عسى ما تشوفه كل عين اقشرا = غير عيني و عين اللي علينا رقيب