السلام عليكم
والليل يرخي ستارا ًَ حول مجلسنا ،
ومشاركة اليوم .........!!!
.
العين خرسااا
.
يالله طلبتك يالولي وأنت اللطيف = يارافع ٍسبع ٍ بعالي أطباقها
ترحم عليل ٍ شايل ٍ حزن ٍ كليف = مرالمصايب ، في حياته ذاقها
جرّيت ونّه هزّت ديارالقطيف = وهزّت أراضي الشام وأرض عراقها
منها خفوقي بالحشا يرجف رجيف = ونار ٍ بصدري ضامري ماطاقها
أونّ من جرح ٍ بقلبي له نزيف = والدمع وسط العين زاد إغراقها
أهل النمايم مالهم قصد ٍ عفيف = دايم عروض الناس بين أشداقها
تضحك وبين أنيابها موت ٍ مخيف = مثل الحيايا ، السّم في ترياقها
ناس ٍ تعاديني على شي ٍطفيف = مـااحد ٍ سلم مـن نارهم وإحراقها
وفرقا الشّمل ماسنّه الدين الحنيف = ولاهوب من طبع العرب وأخلاقها
وش مكسب الليّ حال بيني والوليف = راعي الضغاين نافخ ٍأبواقها
خشف المها بالزين مامعها وصيف = ما بالعذاراء أحد ٍجماله فاقها
العين خرسا والخصر مبري نحيف = والنور بالوجنات زاد إشراقها
والشعرمنثور ٍ كما، فلوة شريف = يسبح على الأمتان واصل ساقها
فلوة فلاة ٍ ! توّها ، غر ٍ، عسيف = معفاة ٍ الخدمة ، وكثر،، إرهاقها
دقّت بقلبي خنجر ٍ حدّه رهيف = قطعّ سراجيفي من أقصى أعماقها
حبّي لها مبني على ساس ٍ نظيف = على عهود ٍ ، مبرم ٍ ، ميثاقها
ياعاذلي في حبها عقلك خفيف = روحين داخل جوف صعب فراقها
ومساءكم ورد وجوري
محمد بن عمار