ياراكب اللي لون بديه كحل قوت=او رمش عينه لاغفى في مبيته
لاصار عندك حزن والهم مكبوت=والناس حولك والاحاسيس ميته
نزل شماغك وازعج الجرح بالصوت=واركب على منخات عمشاء وصيته
من فوق حرٍ اشتهر بأسمه الحوت=يجيب لحظات الامل لابغيته
بديه مثل غروٍ غنج لابسن كوت=ضيق على خصره والارداف بيته
ومراتبه فيها معاناتك تفوت=ويروح من فكرك سرابٍ رجيته
في داخله لون البنفسج مع التوت=وفي مقدمه شيخٍ فزع مانخيته
صدامه الخلفي على الحزن منحوت=كنه يوادع كل دربٍ مشيته
ياسايقه كوّع على خط بيروت=وانص الذي لاضاق وقتي نصيته
يفدونه اللي بس كشخات وبشوت=اللي على شيخة حكي من وعيته
ويفدونه اللي طيبهم غمز وسكوت=اللي على خبث ولعانه لقيته
ممدوح عزي يابعد كل سربوت=اللي على مرقاب همي لفيته
رجمٍ رقيته من غثاء الوقت مبهوت=واليوم من فعلك طناخه رقيته
يابو طويرش جعل الانذال للموت=ياعلهم فدوت نعولٍ رميته