شكرا اصالة تميم على الفكره
أما أنا موقفي كان عندما سافرت للدراسه الى بريطانيا وبالتحديد في مدينه اسمها اكستير فقلت خل اسكن عند عائله على شان اتعلم بسرعه المهم الجماعه رحبو فيني وقعدنا نتكلم عن الاسلام وعن المسيحيه طبعا انا عندي خلفيه بالانجليزيه على خفيف وبعض المرات أصير من جنبها المهم كانو يتكلمون عن واحد سعودي كان ساكن عندهم ماراح الا من شهر ويقولون انه يسوي حركات ودايم يروح للحمام ويغسل وانا عرفت انهم يقصدون يتوضا ويصلي واللي يبغون يوصلونه لي ان الرجال السعودي كان يغسل رجلينه بالمغسله ما أدري وش لون اكتشفوه بس ما أطول عليكم يوم جاء الصبح وقمت اتوضاء وأنا أرفع رجلي أبغسلها بالمغسله وأطيح طقم أسنان العجوز كانت حاطته على المغسله ويوم قضيت غاسل رجلي اليمنى وانزلها وأرفع رجلي اليسرى وأسمع طقطقة طقم الاسنان واثري وطيت عليه يوم غدا ماله معالم من قوة الوطيه والمشكله اللي تخلي الواحد يغسل رجلينه بالمغسله ان الحمام مفروش ولاعندهم شطاف يعني الله يكرمكم مافيه الا مناديل والمروش مافيه الا دش وثابت يعني الواحد لاجاء يغسل رجليه لازم يغسل راسه قبل يعني يتروش المهم شلت طقم الأسنان بمنديل وحطيته على المغسله على أني أبعلمها لاقضيت من الصلاه يوم دخلت غرفتي واسمع الحلطمه واثرها دخلت الحمام عقبي وشافت الفرش رطب والطقم مكسور وكل اللي كانو خايفين منه صار وزياده يوم صليت طلعت وأنا في غاية الحرج وقلت لها أنا أسف وقلتلها اللي حصل بالضبط وانا مسلم ولابد أتوضأ وأصلي ولامن طريقه لغسل الأرجل الا بالمغسله واللي تامرين فيه أنا مستعد قولي لي بكم الطقم وانا أعوضك أحسن منه .
تدرون وش قالت: قالت تعجبني صراحتك والتزامك في عقيدتك وصارت علاقتنا ممتازه جداوالى الآن كل شهرين أو ثلاثه تجيني رساله أو مكالمه منهم وأرسلت لهم كتب عن الاسلام وعن عاداتنا وصور عن الحرمين وكانو معجبين بالدين الاسلامي
ولو كنت متمكن بالشريعه والحجه القويه وحافظا للأحاديث ربما لكانو الان مسلمين .
ولكن للأسف اني كسره بالحفظ .
آسف على الاطاله ولكن الموقف يتطلب ذلك . شكرا لكم