إلي عمري ، إلى همّي ، إلى من همّها أمـري
إلى من قررت نفيي لـواد الصـدّ والحرمـان
أنادي والصدى صوتي بليلٍ غايـب البـدري
أحسّ إني كما التايه غريب الدّار والأوطـان
حبيب الروح ما تسأل ، ولا نت بحالتي تدري
ترى الهجران في حقي قهر ما يقبله إنسـان
تغيّرتي مع الأيام معاد أنتـي علـى خبـري
نسيتي كل شيٍّ راح ، ذكرتي بس انا الغلطان
نسيتي ماضي الذكرى وقولـك دوم ياعمـري
ونا المسكين ما أدري سجينك وانتي السجان
الا يا مهجتي يكفي صدودك خنجر بصـدري
تحمّلته على شانـك تعـودي يـوم للولهـان
أنا داري بأحوالـك وصعـبٍ تقبلـي عـذري
ولكن قلبك الطيّـب أعرفـه دايـم الغفـران
تعالي نبتدي صفحة ، نجـدّد حبّنـا العـذري
ونبني للسعادة صرح ساسه حبّ عن إيمـان
تعالي نزرع البسمة ونعطي للأمـل فجـري
ونضحك مثلما كنّا ونركض في سما الوجدان
تعالي نلعب الشطرنج نفهم كـل مـا يجـري
نراقب فارس اللعبه يخطـط لعبتـه باتقـان
إذا من حرّك لفيلـه حسبنـا لعبتـه تغـري
ولكنّه يفاجئنـا بهجمـة مـا لهـا حسبـان
يدمر كل ما واجه قـلاع وحصـن بالغـدري
على حصان المكر يمشي وقلبه بالحقد مليـان
تعالي يا بعد روحي نسافر فالهـوى بحـري
بنهر النيل أو دجله نشوف الربـع والخـلان
تعالي واتركي غيري ، على قلبي فلا يطـرى
حبيبٍ غيرك أنتي بس لوني بالهجر تعبـان
أحبك ليش ما أدري ، سحرتيني على كبـري
على جزرك ، على مدّي ، وقلبك كالحجر مالان
وذا منّك فقدتيني فـلا تبكـي علـى قبـري
وصلي ثم ادعي لي عسى يغفر لي الرحمـن



حاولت اختار بيت اوبيتين من القصيدة
كمثال للإعجاب لقيت كل بيت احلى من
الثاني وكل القصيدة على بعضها رااائعة
وجميلة في كلماتها ومعانيها وبحرها
صح لسانك مليون ولا يكفون والله يعطيك
العافية استاذنا ،،،،،، ابو عبدالله