[ابومياس]

مع قهوة الصباح احيانا القهوة بالصباح
تهيض قريحة الواحد من الراس للكراس ( للمنتدى )
وليدة هذا الصباح ارجو قبولها كما هي 0 دمتم بخير0

يابعد من كان واللي صار كان = ويابعد كل الكتابة والرسائل
مد لي كفك وبعثرني حنان= مد لي والكف تعمل بي عمايل
الامان ان عشت بايدينك امان = والحنان اللي معك والله هايل
زد حياتي ( فرفشة زدها كمان) = وضمني للصدر غطن بالجدايل
وامسحي بالكف ندبات الزمان= فعل وقتٍ صار لي بالحيل مايل
بس وربي انتعش معك المكان= ومن عرفتك بالبشر ماني بسايل
كاسبٍ في حبكم احلى رهان= ومحتويكم بين الاضلاع النحايل
عنجهية مغرمٍ صابه جنان= ياجنان العقل سويت الهوايل
شاعرك لاقال قافٍ ماستهان = فيك يامن تلهمينه بالمثايل
لاذكرتك فالقصيد الكيف زان= ولا لمحت الزول صار الهم زايل
ولو كتمت الحب غصب الحب بان = اكتمه والحب كبر جبال حائل!!
ياحمامة بلغي صاف الثمان= خبريها ياحمامة بالمسائل
باختصار انه حناني والامان= ومدة الكفين تعمل بي عمايل