[الطائر المهاجر]

ياذيب انا بوصيك واسمع وصاتي = وافهم كلامي لاتغيرك الازمان
الذيب لو هو جاع حتى المماتي = ماله نظر في جيفةٍ ريحها بان
ومن هو نوى صيدك بحلو السماتي= اركد الينك تازنه بالف ميزان
لسع الحيايا موردٍ للوفاتي = واخاف من حيه تدارى ببيبان
باب المحبه لو لقيته مواتي = يمكن وراه اللي تخدعك بالالحان
حبٍ بليا تضحيه يا غناتي = ما ينفعك يومٍ تلاقيه دكان
ياخذ ويرسل في جميع الجهاتي= قمر صناعي فيه من كل الالوان
في وقت فيه الناس تخفي النواتي = وما عاد تفهمها ولو كنت ذيبان
وليّاك تقبل ما تجيب الرواتي = افحص ودقق لا تقل قاله فلان
حكم العجاله واتركه للهواتي = وحكم الخطأ ظلم وقهر وبهتان
يمكن يكون اللي يقولك حياتي= صادق ولكن جاهلٍ بعض الاحيان
يقولها للغير رجل وبناتي = وما يعرف إن الحرف محسوب باثمان
يطمع به الحصني ولو كان عاتي= اما فرسه وإلا كتب عنه خربان