كفانا الله واياكم شر الكساد وتبدد الثروات هذه ابيات قديمه نوعا ما تحكي حال سوق الأسهم ووجدها مناسبه في ضل الأزمة الراهنه....تحياتي وتقديري
يـاسوق الاسهم كان لك الف تقدير=والـحين كـلاً مـكتوي بالخساره
عـلـقـتنا مثل السواني على البير=و اسـقـيـتنا كاس الآلم والمراره
احـلامـنـا كـانت تجينا طوابير=لـين انـحرف قطارنا عن مساره
الله اكـبـر يـازمـان الـمـقادير=خليـتـنا من خلف ركب الحضاره
كـنـا نـبي نصبح كبار و هوامير=و البعض مـنـا باع حتى العماره
احداً خذا قرض ودخل دون تـدبير=و احداً تـسلف مال من عند جاره
واللي بقى من راتـبـه للـفـواتير=و البعض ما يـبقى ولو ربع كاره
ما عاد احد داوم و لاصـار تطوير=حتى الخفير يغيـب و قت الخفاره
من لاسمع نصح وكـلام ومـحاذير=عـزالله ان الـفقـر يصبح شعاره
ما يدري ان السوق سوق الهوامير=ماهوب سوق المعـرفـه والشطاره
الله يـسـتر لا تـزيـد المـخاسير=وانصير عبره فـي مجال التجاره
وانبدل الموتر بشـاتين و ابـعيـر=والا نبيع عطور عـند الاشـاره