[هاجس نجد]

المشاركة الأصلية كتبت بواسطة الطائر المهاجر

اسر لي احد الأصدقاء عما لاحظه من احد ابناءه من اختلاف بعد ان اصبح رجلا
وصار له راتب ، وكيف بدأ يعامله معالمة أقل ما يقال عنها إنها ضرب من العقوق
رغم محاولاته اليائسه معه ، فكان ان عبرت عنه بهذه الكيبورديه

ماهوب مشكل لا عرفت الأذيّه= تاتيك من شخص تعرفه وتحريه
المشكله لاجتك عن سوء نيّه = ممن دفعت العمر لاجله تغذيه
فالوقت غيّر في نفوس البريّه = حتى ولوهو يحمل اسمك وتغليه
تحسبه خبرك بالمبادي العليّه= واثره تغيّر وانت تجهل خوافيه
كبرت لغاديده وصارت عتيه = واصبح عقوقه واضحٍ من مماشيه
لاهوب ورعٍٍ فاقدٍ للرويّه = ولا هوب خبلٍ أو مريضٍ تداريه
والمشكل اكبر لاكتمت البليّه = رغم الأذى ما ودك بشي ياذيه
تضطر تكضم جمر يحدث لجيّه= ولاهوب داري عنك فابليس مغويه
لكن اذا قارنت بينه واخيّه= تتحمد اللي ما يخيب الرجاء فيه
عندك رجالٍ مامشوا بالرديّه= لا قلت يا رجالي فكلٍ تلاقيه
فخله على فاله بخبث الطويّه= فالهادي الله والليالي تربيه

الله-الله- الله- تعبير منطقي- يالطائر المهاجر

تسلم تسلم يا أبو عبد الله

صح الله لسانك مليون ولا يسدون

عزالله إنك شفيت قلوبنا قبل صاحبك

إجتماعية وواقعية ميّه بالميه

مشاء الله عليك إذا بغيت الشيء تجيبه بوصف دقيق

وكأنك عايش معاناة صاحبك وممن هم عايشوا الموقف أمثاله

بدون مجاملة قصيدة تستحق النسخ والتوزيع

على من يعانون من عقوق أبنائهم وجحودهم

لك شكري وتقديري وإعجابي

أخـــــوك

هاجس }{ نجـــــــد