أنا أشهد أن الود ياصاح فضاح=كلما مسحته هارق الدمع ساحي
وأروح للترواح لي ضاقت أرواح=ياكود في الترواح القي صلاحي
وأرقي بمرقابن تراقيه لشباح=في مهمهات شرق ذيك النواحي
واراقب أطيوف عسي كود ياصاح=أشوف طيفه في أطيوف الصباحي
غض غضيض أحور الطرف وضاح=سيد الغواني كاسيات الوشاحي
عذب الشفايا باهي الخد مزاح=من وجنتينه غالي الطيب فاحي
عشنا وياهم في ملذات وأفراح=نشرب لذيذ الود ونعل راحي
وأتبع ثري خلي أنا وين ماراح=وأمزح معه ياطيب ذاك المزاحي
هذاك لول شوفني كيف ياصاح=واليوم شفني كيف طول مراحي
في خايع نائي عن الناس نزاح=كأني طريد القوم زرق الرماحي
ومن كان له عند الخوندات مفتاح=ياضيعة المفتاح عند لملاحي
أنا أشهد أن الود ياصاح ذباح=مامربي مغرم من الود صاحي
كأنه علي يمناه نزاع لرواح=ومن خلف ظهره مكثرات النواحي
ياربنا يامرسل الجود سحاح=يعم خيره في جميع النواحي
ويسيل مسياله علي كل مسياح=ويعم جوده لين دار الفلاحي
ويصفي غديركان بالأمس ضحضاح=وتفرح به البدوان من كل ناحي
ترحم ضعيفا ياكثير التمناح=يدعوك دايم بالهدي والنجاحي