[طلال المسيمير]

بعد غيابي عن بيتي الثاني ازوركم اليوم مشفوعا بقصيدة لعلها تشفع لي عن انقطاعي هي مجرد خاطرة قد تروق لكم وقد لا تروق اقبلوها كماهي بدون تاؤيل ..

كافي تلاعب بالبشر يأهل المال = كافي نزيد أوجاعنا اليوم كافي
سحبت اجيوب الناس من مسج جوال = حتى الفقارى المعدمين الضعافي
ثلاثة اعوام(ن) على نفس موال = صوت ورشح والخوافي خوافي
بيعت مشاعرنا على فلس وريال = وغاب الضمير وغاب جزل القوافي
وربوعنا بالدرب بقفاي وقبال = هذا مغادر صبح وهذاك لافي
تطرد سراب الإل في كل ترحال= ترجي حصيل من السنين العجافي
حتى مجالسنا في ابن هن وش قال= سوالف(ن) لأهل العقول الخفافي
لازال عصر الجهل يالربع لازال = ما دام فينا ناس باقي غوافي
هذاه رجل اعمال يهدر له اموال = وهذا جبر فاتح محله مضافي
وهذا يجمع ناس قطوا للابطال= يصيح ينخى مدوا الصاع وافي
وادفع ولا تنشد تبي سترت الحال = وان غبت قالوا منت والله اسنافي
ما حسبوا للوضع لو قصر لو طال = ولا شالوا اللي يمشي الدرب حافي
ووضاعنا تبغي لها ناس عقال = اهل الفكر واهل العقول النظافي
اوطان تغزي تنذبح فيها الاطفال = ووطان ينقصها الامن والمشافي
ووطان فيها ناس ارامل وجهال= تبي الغذاء تبي السكن والمدافي
وبيوت ما تملك من العيش مثقال = ومن الحياء تخفي الفقر لا يشافي
وقليل منا يرجي الفقر ينزال = وكثير ما شاف الفقر ومتعافي
عرب وبالافكار نتعب لجل مال = بارخص اساليب المكر والتجافي
انقول ونردد بتزيين الافعال = ونسلب اجيوب الغير والنور طافي
مرت تجارب ولا تحسن لنا احوال = قاطع وشارك والدعاوي عوافي
فينا ومنا اجيال وجيال وجيال = تفرح ليا شافت اصورها اغلافي
ياشلة التصويت وش عاد ينقال = باسباب دفع المال صار اختلافي
هضمت احقوق ارجال ورجال ورجال= والامر ما غطاه طول اللحافي
وابسط حقوق الشعر لا ريح البال= بالكلمة اللي توصلك للمطافي
ليا قيل تسلم وصح راسك وفي الحال= تغنيك عن تصويت ربعك وكافي