[سالم منصر الجعيدي]

انا كنت ضمت المشاركين بالنسخه الثانيه من شاعر المليون مع شاعرنا الكبير /ناصر الفراعنه شاركت بالدمام كنت اول متسابق دخل على اللجنه وتم اجازتي من الجميع وصار بيني وبين الدكتور نقاش زعله مني وتم إختياري من 1200 متسابق ثم تم إ ختياري
من ضمن الـ700 ثم من ضمن الـ100 كان المنعطف الاخير إلى الـ48 ولكن هنا؟؟؟؟؟كان للتدخلات والواسطات إبن عم صديق إلخ....
ياما يصير خلف الكواليس ولكن ماندمت على شان لم أكن من ضمن الــ48 يكفيني معرفة ابو فارس وع العمري أستاذ الاشاره.....
أما الاّّن يهمني رايكم بدون مجامله.



توفى وعمره10+8اسنين

شقتني بروق ٍ مجنبه تجذب السارين=على الديره اللي ماسكنها سوا مخلوق
غزاه المرض واستوطن هناك من عامين=وجته المنيه عاد قلبي معه مسروق
توسد يمينه بس زوله بقى بالعين=ونفسي لقبره كل ليله عليه (إتوق)
توفى وعمره عشر زايد ثمان اسنين=على اول شبابه واشتعل في حشاي الشوق
دياره خلا وان جوه ناس ٍ يجوا عجلين=وانا أجيه وأقصر خطوتي بالحزن مخنوق
أزور القبر والدمع مافارق العينين=وأشوفه يسبح مبتسم والنواظر فوق
صفاته جمال وخلق عالي وعلم ودين=عفيفٍ جنابه لا خفيّف ولا مطفوق
عسى الله بعد موته يموج الحزن ويعين=ويلهم ذويه الصبر ويداوي المحروق
تربى على حسن التعامل بعطف ولين=يطيع لأوامر وآلدينه بدون إعقوق
يحب الصلاه ولايفرّط في البردين=على الواجبه يحرص وإلى أدّى الفروض يروق
يصوم الخميس وعاد عينه على الاثنين=محافظ مطيع وكل مسلم عليه إحقوق
حدوده حدود البيت ماساير الغاوين=حياته نقى يشره على طلعته للسوق
ولسانه محصّن ماتكلم على المقفين=يحب الستر ماهوب للمخطيه مسيوق
خذا القلب مني والوداعه معه للحين=يحفظ الأمانه زين والسرّ في صندوق
عطيته محبه لو تقسم على ميتين= من اهل الهوى غطت عليهم غلا وتفوق
ولكن خذاه الموت مني بشوف العين=وهو يحتضر وادع بدمعه حضنها الموق
بعدها مشيت وكن وسط الحشا سكين=أعيد الزمن للخلف وأتذكر المعشوق
وأسولف مع السمّار وأضحك مع السالين=مجامل وأنا في داخلي بعد ذاك إفتوق
عسى الله يصبرني ويحقن دموع العين=ويستر علي لاصار ثوب الزمن مشقوق
توفى وليفي بس حبه ليوم الدين=مخلّد ولا ساواه في ذا البشر مخلوق