[شجاع عمر الأكلبي]

وجّهت من ضيقة ٍ بالصدر عصريّة=أدور علاجها في صحصح ٍ خالي
من فوق شاص ٍ من خيار البريميّة=شاريه من حُر مالي نقد بريالي
ماجا عطيّة ولا من الغير عاريّة=ومن الشحاذة وأهلها تكرم سبالي
وجهتبه والتوانك فل ممليّة=ومكمل ٍ عزبتي بالمر والحالي
وعن البشر رحت في دار ٍ خلاويّة=وأبعدت عن ذبذبة الإرسال جوّالي
ووقفت في ديرة ٍ بالوبل مسقيّة=على يميني الضنط والباطن شمالي
وشبيت ضوّي لكيف الرأس بريّة=ضو ٍ حطبها حطبته جزل وجلالي
ونزّلت لي من خيار الفرش زوليّة=وفرشتها عكس صفق الساعر الصالي
والشنطة اللي من الأغراض ممليّة=الكيف فيها وفيها كل معمالي
وقننت ماء دلتي في وسط خمريّة=من صنع بغداد جت مع من جلبهالي
وجذبت جمر ٍ من أسفل ناري الحيّة=وفرشته لدلتي تقطع بالإمهالي
وقربت نجر ٍ قديم ٍ صنع سوريّة=لاسمعه اللي حزين يون ويلالي
ودقيت به قفرة الكيف الخليطيّة=مابين هيل ٍ وعود وقرف سنغالي
وقربت من تمر بيشة نوع صفريّة=وقدعت سبع وعددها وتر فنجالي
وبعد العشا طاب لي لعب الهجينيّة=ونظمت سبعة عشر بيت ٍ على الآلي
ذي ونستي لاحصل بالصدر تكيّة=أروح في صحصح ٍ ماغير أنا لحالي
تحتدني للخلا نفسي الشقاويّة=واللي بينقد عليّه ماله ومالي

الضنط المذكور بالقصيدة جبل علم يقع في المهمل بين بيشة ووادي الدواسر