[احمد الجريفاني]

عقب اندمال الجرح جيتي تزورين= زورة ندم والا حنين لعذابي
جيتي عقب ما ضاع من عمري سنين= ايام كنتي ما تمرين بابي
توقفي يابنت لا تستعجلين= يكفيني انه ضاع دونك شبابي
يا ما فديتك يا سود(ن) داخل العين= واهديت لك روح البيوت العذابي
يا ما مسحت دموع من فوق خدين= تخاف هجراني وتخشى غيابي
واعطيت لك عهد(ن) رجح بالموازين= ولا نقضت العهد رغم اغترابي
كنتي امل روحي عبير البساتين= حلم ليا ضاقت دروبي سرى بي
كنتي عروس العمر نور المزايين=اخاف اكدر خاطرك في عتابي
اخشى عليك من القدر والحسودين= واقبل عليك بلهفتي والتهابي
رحتي شريتي من رصيده ملايين= لون الذهب خلى رموشك حرابي
ليته درى عن غدرك اغتر بالزين=طبع الحمامه غير طبع الغرابي
ما كنت اظن الورد يقسى على الطين= ولا ينكر الطل الرقيق السحابي
وما كنت اظن الحور تمشي بقلبين= ولا لذيذ المي يصبح سرابي
ولا يجيني يوم بقفاه تقفين= كنك حسدتيني بليلة مصابي
انا غني النفس وانتي تعرفين =قمة فخاري شيمتي وانتسابي
يللي غدرتي بي بليلة ثلاثين=شوفي على تعدادها الراس شابي
جيتي عقب ما عافك اللي تودين=هو طاب منك وخاطري منك طابي