انت ياللي تبغي الطيب واعلومه = هاك مني اعلومٍ توها طازه
يوم ضاقت علي كني بتنّوُمه = ليل مظلم وخطٍ صعبٍ اجتازه
كبدي اللي بساعتها عطت حومه = وانقطع بي الرجا وبانت العازه
بنشرالموتروسبيره كثرت حطومه = والبقيه على الرنقات معنازه
والسلوك الهاتفيه كنها بومه = مابها ارسال لابوها من اخنازه
ليلة تفرق الطيب من ارخومه = واطلب الله من للطِيب يحتازه
شفت ليت النشاما في علا احزومه = وقمت اشر بنورٍ خلف محوازه
قالوالنور يعطي افلاش وش قومه = وجهوُ لي وكني اللي بعكازه
قالو ابشر ووقلبك راحت اهمومه = انت ريح واعط الخبز خبازه
كلهم طيب حلحيل باسلومه = وهمته عاليه واللاش مارازه
ذاك الصعاق والنومان بهم شومه = في العلوم الرديه مالهم عازه
وذاك ابن هايله مايلحقه لومه = طيب ومن خيار القوم واعزازه
ثم لفانا صبي الخير في قومه = صاملٍ والغنايم دوم معنازه
ذاك اخو ملهيه والطيب مغرومه = جيدٍ وبالمراجل ماهو اعفازه
بوعلي راشدٍ بالخير يادومه =وكل طيبٍ من الجدان قد حازه
وقام ولد الهميمي حطها كومه = في ظهر موتره ومولعٍ قازه
ساعتين وجاب الماي واطعومه = وزادها اللي جديد وتو بطرازه
جعل يفداه من تلعب به احلومه = يحسب المرجله عصرات من مازه
بنت شومي من للروح بيسومه = نادر من نوادر ويل من هازه
ذي اعلومي ياهل الكار واعلومه = من بدا الطيب يجزى به وهو طازه