[نورة الشبيلي]

في خاطري شيٍّ ولا اقـدر أطيقـه

فاسمع كلامـي لـو تأخـر دقايـق

الحـب قسمـه مـن الـه الخليقـه

وغيرك فلا حبيـت بيـن الخلايـق

كان السعد من قبلك اجهـل طريقـه

وكنت الفرح لا صرت في يوم ضايق

اطرد سرابك بالخطـاوي السبيقـه

حتى اصطدم وهمي بمـر الحقايـق

من دون ماحسب للبحـور العميقـه

تاه الشراع وتهت بيـن المضايـق

ولقيت نفسـي بيـن هـم وضيقـه

مهما احتمل ماعادني اليـوم طايـق

حيث إن حبي ما درى بـي دقيقـه

ولا هو فهم للحب شـرع وطرايـق

من لا افتهمني ما درى عن رفيقـه

حتى ولو هم فـي المحبـه غرايـق

حب العواطـف مـا يطـول بريقـه

وحب العقل يثبت ولاهـاب عايـق

وحبك ولو كالورد يغـري رحيقـه

كالورد فيك الشوك تحـت الرقايـق

ما خذت حذري منه اهـوى عبيقـه

حتى لسعني فـي صميـم العلايـق

آن الأوان إنّـك تعـرف الحقيقـه

الكره قسمـه وانـت للكـره لايـق

ما شاء الله تبارك الله
احترت اي بيت اختار .. قصيدة رائعه تشد المشاعر بلا هوادة

كلك ذوق وحسن منطوق

لاعدمناك

الله يرعاك