[عبدالله مذكر العقيلي]

نادى الجنوب وجاوبه نجد لبيه = أمر تدلل يابعد كل الاوطان
يخسى المعادي حدنا مايجي فيه = ماقدمه الا نار شعله ودخان
نركي عليه الصالي اللي يخليه = مثل الرماد وكن ماكائنٍ كان
ومن العذاب المر والسم نسقيه = ونزود الجرعه ليا صار عطشان
اجنودنا دون الوطن دوم تحميه = ابطال فالميدان خبره وشجعان
بقيادة اللي جعل ربي يعافيه = الحاكم اللي له معزه وله شان
وبرواحنا حد الحرمين نفديه = ويصير كل الشعب قوه وفرسان
ياويل من جانا ويبغى يعاديه = يلقى العذاب ويرجع اكيد خسران
اللي يخون الدار ويبيع اهاليه = ماهو محصل له مع الناس مسكان
ابليس عن درب الاجاويد مغويه = مدري وراه من البشر شخص شيطان
والمتهم والله محدٍ يبريه = يبين في وجهه من الشر عنوانٍ
والا اليمن شعبه نحبه ونغليه = علاقةٍ زينه وصحبه وجيران