[محمد السالم]

يا منتهى الذوق ؛ كيف الشوق ماذقته!=وانا أنتهي لك على ماذاقت أوراقي
هذا الشعر في عمود الحبرعلقته = رفع لك ارِباع حب سمكها راقي
ثبّت لك أطناب حبٍ ماتخلقته = وهَدّب رواق الوفا من دم خفاقي
يَحمس لك الود بنٍ سالت عرقته = ويهشْم لك قناد صدرٍ نجره اشواقي
اسوق فنجاله اللي كل ماسقته = قدّم يده وانتزع فردة من اعماقي
صدّقت حلم الوفا لو حلم صدّقته = واسقيت غصنه من الخفاق واحداقي
انا احسب إن الوفا حلمك وحققته = وإنّك تجاهد بوصلك خنجر افراقي
لين انجلا الغيم والخافي تحققته = طاحت نجوم السما في صحوة اشراقي
شفت الحقيقة تجر الحلم شانقته = وش عاد باقي بعد ما شفت وش باقي
وانا بدويٍ شهامة بدو مغرقته = محيطي البيد تسبر غوره نياقي
محّاري الصيد يطربني ليا عقته = في خلّة مالبشر تفتح لي افاقي
لا هبّ كوس الجنوب وجيت عانقته = صار الفضا نقطة في قاع معلاقي
من صد عنّي بيبطي ما تملقته = لو روحي بعودته تمنعني أخلاقي