يسعدني ان اشارك بهذه القصيدة على امل ان تحوز على رضاكم
اشوف لي رجال بزوله وشكله = ويوم التفت ماهي تواصيف رجال
شعره طويل ورابط فيه بكله = متعجب في طول شعره ومختال
وله مشية فيها انعواجه وفتله = وان مالة الغره جلحها على جال
استبدل لبس الثوب بجنز وبدله = وقميصها يحمل تعابير واشكال
اخبث عبارات عليها اكتبت له = ولها معاني ماتسولف وتنقال
يفخر بها ولايدري انها اشتمت له = بالانجليزي احروفها اعراض واطوال
والموضه اللي ظنها ميزتله = في يديه سلسال وبالعنق سلسال
ولو جيت له بالنصح مايصتنت له = يركض ورى الموضات رجلي وخيال
دلوعة امه ماطلب وفرت له = لو من ذهبها تبيع وتوفر المال
ماهمها الا ضحكته الى انظرت له = لوان حياته كلها اهبال في اهبال
وابوه تايه في حياة زهت له = يركض وراها بين الاقفاي واقبال
والبيت واللي فيه مايلتفت له = لاحافظ بيته ولامربي اعيال
والى حصل له مشكله نبهت له = يندم ولاينفع ندم بعد الاهمال
شبابنا من الغرب قوم غزت له = ناس غزت بافكارها عقول الاجيال
باسم التطور فكرها صدرت له = عادات وافكار غريبات واخبال
ونهج الشريعه دربها وضحت له = منهج صريح واضح مابه اشكال
وعاداتناواخلاقنا ورثت له = ميراث اهلنا ثوب وشماغ وعقال
ياهيه يامغتر بدنيا صفت له = احذر ترى الدنيا غرابيل واهوال
واحذر يحيك الموت بغفله وختله = وتغادر الدنيا على سو الاعمال
وصلاة ربي عد ما سبحت له = رب الخلايق عالم كل الاحوال
على الذي كل الملا تبعت له = محمد الهادي عدد وادي سال